SEAN DE GUZMAN WAGI BILANG BEST ACTOR SA CHITHIRAM INTERNATIONAL FILM FESTIVAL NG INDIA AT ANATOLIAN FILM AWARDS SA TURKEY

Masaya ngayon si Sean De Guzman sa tinatakbo ng kanyang showbiz career. Malayo-layong biyahe na rin ang kanyang nilakbay simulang pasukin nito ang pag-arte sa kamera. Simulang mailunsad siya sa pelikulang Anak Ng Macho Dancer ni Direk Joel Lamangan na produced naman ng GodFather Productions ay nagtuloy-tuloy na talaga ang pagbuhos ng biyaya sa kanyang buhay. 

Aminado tayong pagpapakita ng katawan ang naging puhunan ni Sean De Guzman lalo na nung pumirma siya ng co-management contract kasama ang kanyang manager ng 316 Events And Talent Management na si Len Carrillo para sa Viva Artist Agency.

Pero hindi naging sagabal ang pagiging sexy star niya dahil from day one ng kanyang pagiging artista na tinagurian pa nga'ng Pandemic Actor ay hindi rin masusukat ang ipinamalas nitong galing o husay sa pag-arte sa bawat pelikulang ginawa niya kaya tumatak talaga siya!

Kaya naman nitong dalawang buwang magkakasunod ay dalawang naglalakihang parangal ang kanyang nabingwit. Dalawang tropeyo bilang Best Actor sa Chithiram International Film Festival-India at sa Anatolian Film Awards-Turkey para sa pelikulang Fall Guy ni Direk Joel Lamangan na produced naman ng 316 Media Network at Mentorque Productions. 

" Grabe Tito. Pati ako nagulat din eh! Hindi ko rin po inaasahan ang mga nangyayaring ito sa career ko ngayon. Sobrang nakakagulat at nagpapasalamat po ako sa Chithiram at Anatolian sa napakalaking bagay na pagkilala po nilang ito sa akin bilang isang baguhang aktor. Salamat din sa kay Nanay Len, sa lahat ng nagtitiwala sa akin, sumusuporta, lahat po. " paglalahad pa ng aktor sa aming tsikahan kamakailan.

Napanood namin sa isang private screening sa grupo naming publicist ng 316 Familen ang buong pelikulang Fall Guy na naging entry ni Sean at hindi ko pinalagpas personally ang mayakap siya, purihin siya at palakpakan sa husay nito sa pelikula. Honestly, totoo talaga. Pakahusay ni Sean sa movie at ang lalim ng characterization niyang napakabilis kaya siguro nasungkit niya ang pinaka-mahusay na aktor!

" Sana magtuloy-tuloy lang po ang lahat ng ito. Dami kopa po gustong gawin. Yung sa career ko. Tapos sa mga taong nakapaligid po sa akin, sa amin sa Familen, dami pa. " aniya.

Nakapag-pundar na rin si Sean ng kanyang sarili sasakyan, lupa at bahay. Pinagsikapan niya naman ang lahat ng ito at kanya ring ipinagdasal. 

Ngayong October ay aalis si Sean for Barcelona para naman sa isang festival doon. Happy for you Sean! Soar high Nak!