MAGKAIBIGAN NAGKASIRAAN DAHIL SA FIVE THOUSAND, PINAG-AYOS NG CIA WITH BA

Magkaibigan, nagkasiraan dahil sa five thousand, pinag-ayos ng ‘CIA with BA’

“It’s difficult to do but let’s all try to tame our tongue.”

Ito ang mga salitang binitiwan ni Kuya Alan Peter Cayetano, kasama ang kapatid na si Pia at co-host na si Boy Abunda, bilang panapos sa episode ng ‘CIA with BA’ nitong Linggo, Enero 21.

Sa segment na ‘Case 2 Face’, inireklamo ni Annaliza Dinquil ang kumareng si Daisy Bon na pinautang niya ng P5,000.00. Ayon kay Annaliza, pumayag siyang pautangin ang kaibigan dahil nakumbinsi siyang ito ay magkakaroon ng tubo o interes. Subalit hindi ito natupad ni Daisy dahil na rin sa iba pang utang at problemang pinansyal.

Mas lumala pa ang kanilang sitwasyon dahil sa mga paninira na binitiwan laban sa isa’t-isa sa kanilang mga kapitbahay.

“Kung ang problema ay pera, ‘wag na magsalita ng iba na hindi tungkol do’n sa utang,” diin ni Alan. “Kung ang problema [ay] may nasaktan, ‘yun lang [ang pag-usapan]. ‘Pag dinagdagan mo, dagdag din ‘yung problema.”

Sa pagtatapos ng segment, humingi naman ng tawad si Daisy, mula kay Annaliza.

“Humihingi ako ng tawag sa’yo, sa mga masasakit na salitang sinabi ko sa’yo. Pasensya na talaga,” aniya. “‘Yung utang, babayaran naman kita pero hindi ko masasabi sa ’yo kung kailan at anong araw dahil alam mong walang-wala ako ngayon.”

“Willing naman akong intindihin. Lagi naman kitang iniintindi. Dahil lang sa pera tuloy, ‘yung friendship nawawala,” maluwag na sagot ni Annaliza kay Daisy.

“The earlier [na] ma-solve ang problema, the better. And then ‘yung nasa Bible, ‘Tame your tongue,’” pagninilay ni Alan sa sitwasyon ng dalawa.

Para naman kay Tito Boy: “I will build on what Kuya Alan said: ‘tame our tongue.’ Dahil the power of words, iingatan natin.”

“Minsan ‘yung utang napapag-usapan e. Pero pag nagbitaw ka ng mga salita na masasakit, ang hirap bawiin. Ika-nga, ang hirap pulutin ng mga salitang masakit na binitawan mo laban sa isang tao,” dagdag niya.

Nangako rin ang ‘CIA with BA’ na magbibigay ng tulong para sa pang-araw-araw na kakailanganin nila.

Ang ‘CIA with BA’ ay pagpapatuloy ng nasimulang misyon ni Senador Rene Cayetano, ang yumaong ama ng magkapatid na senador. Si Senador Rene ang orihinal na abogadong nagbibigay ng legal advice sa telebisyon at siyang host ng sikat na programang ‘Compañero y Compañera’ noong 1997 hanggang 2001.

Huwag palampasin ang ‘CIA with BA’ kasama sina Alan, Pia, at award-winning TV host na si Boy Abunda tuwing Linggo ng gabi, 11:00 sa GMA7.