NAGPAUTANG NG 150K MAKAKASINGIL NA SA TULONG NG CIA WITH BA!

Nagpautang ng 150K, makakasingil na sa tulong ng ‘CIA with BA’!

Dumulog si Emy sa ‘CIA with BA’ upang humingi ng tulong at payo tungkol sa pera na inutang sa kanya ng kanyang hipag at bayaw.

Sa segment na ‘Payong Kapatid’ sa episode nitong Linggo, Oktubre 1, ibinahagi ni Emy kina Senador Alan at Pia Cayetano at Boy Abunda ang buong kwento.

Noong 2019, isinangla nina Jenny, hipag ni Emy, at Marlon, kapatid ni Jenny, ang kanilang sasakyan sa halagang Php150,000, at babayaran ito sa loob ng pitong buwan. Dahil tiwala si Emy, pumayag din siyang hindi na kunin ang sasakyan dahil ibina-byahe ito nina Jenny at Marlon para kumita pa ng panghulog sa sasakyan. Lumipas ang isang taon, hindi pa rin nakabayad ang dalawa kay Emy.

“First month pa lang po ng hulog, hindi na po nabuo ‘yung 24,” saad ni Emy, patungkol sa dapat na Php24,000 na buwanang hulog sa kanya nina Jenny at Marlon. “20 (thousand) lang po ‘yung naano nila hanggang sa hindi na talaga sila nakahulog.”

“Umabot lang po siguro ng Php65,000 ‘yung nahulog nila, pa-utay-utay,” dagdag pa niya.

Mas masakit pa para kay Emy dahil noong 2021, naibenta nina Jenny at Marlon ang sasakyan ngunit hindi pa rin siya binayaran.

Bilang patuloy na layunin ng programa ang tumulong at magbigay-serbisyo, nagbigay ng legal assistance ang ‘CIA with BA’ kay Emy. Sinamahan siya ng programa sa Metropolitan Trial Court upang makapag-fill up ng mga form na kailangan para makapag-file ng claim at masingil sina Jenny at Marlon.

“Siguro ‘yung pag-uutang, ‘yung pangangailangan at ‘yung [may] mabubuting puso, natural na sa buhay natin,” sabi ni Senador Pia sa pagtatapos ng naturang episode.

“So kung kayo’y magpapautang, mag-isip kayo ng maraming beses. ‘[Like] kung may kakayanan naman talaga kayong mawala ‘yung pera na ‘yon, dahil may posibilidad na hindi makabayad ang umuutang,’” paalala niya sa viewers. 

“Hindi naman kaswapangan ‘yon kundi pag-iingat lang naman ‘yon sa pinaghirapan na salapi,” dagdag pa niya.

Ang ‘CIA with BA’ ay pagpapatuloy ng nasimulang misyon ni Senador Rene Cayetano, ang yumaong ama ng magkapatid na senador. Si Senador Rene ang orihinal na abogadong nagbibigay ng legal advice sa telebisyon at siyang host ng sikat na programang ‘Compañero y Compañera’ noong 1997 hanggang 2001.

‘Wag palagpasin ang ‘CIA with BA’ kasama sina Alan, Pia, at award-winning TV host na si Boy Abunda tuwing Linggo ng gabi, 11:30 sa GMA7.