SOFIA ANDRES MASAYANG IPINAKILALA ANG ANAK NILA NI DANIEL MIRANDA

Marami ang nagtaka kung bakit biglang nanahimik ang showbiz career ng napakaganda at napakaseksing aktres na si Sofia Andres noong nakaraang taon. Naging laman pa ng blind item ang sikat na aktres.
We've heard about it kung saan isang malapit din sa pamilya ang nagkumpirma nito sa akin. Nanatili akong tikom ang bibig patungkol sa pagbubuntie ni Sofia dahil unang-una ay choice iyon ng aktres. Isama mo na rin ang malaking pagrespeto ko sa buong pamilya ng aktres.
Hanggang sa nitong araw ng sabado lang bago mag-father's day ay inilabas na mismo ni Sofia Andres sa kanyang instagram account ang larawan nilang dalawa ng kanyang napakalusog na baby Zoey na anak nila ni Daniel Miranda na isang racer from Cebu na nanggaling sa isang kilala at respetadong angkan ng mayayaman huh! Apat na taon din pala ang itinakbong relasyon nina Sofia at Daniel bago sila magdesisyong magkaroon ng baby! Napanood ko rin ang ginawang video ni Sofia patungkol sa kanilang naging journey ni Daniel mula nung unang araw na magkakilala sila hanggang sa mabuntis siya at manganak! Bongga yung panghuling litanya ni Sofia sa kanyang ginawang video para sa anak nilang si Zoey na ' Welcome to our lives '!
Naging malapit din kami kay Sofia lalo na kay Mommy Monette Alejandre na ngayon ay isa ng ganap na Lola kay Zoey!
" Actually Tito Dom, kaming mag-asawa pa talaga ang huling nakaalam na buntis na si Sofia. Nung una Tito ay sobrang nag-worry po ako, kasi, may mga endorsements siya eh! Tapos may mga plano pa sa kanya. Pero nung mahimasmasan po ako, napalitan na yun ng tuwa! Naisip ko na nandiyan na yan. Baby yan at isang blessing yan kaya sinuportahan namin si Sofia. " paglalahad pa ni Mommy Monette sa aking panayam.
" Tito Doms, siyempre po, kapag anak mo, hindi mo talaga matitiis yan! Kahit anong mangyari at kahit po anong gawin nila, anak ko po yan! " dagdag pa ni Mommy Monette.
" Ang mahalaga po Tito ay masaya po lahat, both sides, happy lahat , especially sina Sofia at Daniel, yun po yung pinaka-importante sa lahat! " pagtatapos pa ni Mommy Monette Alejandre.
Sa aking panayam ay mukhang wala pang mangyayaring wedding soon dahil kaka-renew lang daw ng kontrata ni Sofia sa Kapamilya Network!
Meaning, tuloy-tuloy na this time ang muling pag-ariba ng showbiz career ni Sofia! Bongga yan dahil napakaguwapo naman talaga ng kanyang asawang si Daniel at suportado sila ng kanya-kanyang fanily circle!

JAM IGNACIO AT KARLA ESTRADA, IKAKASAL NA

Before lockdown dahil sa pandemyang dinaranas ng buong mundo ay naging usap-usapan ang kasalang Jam Ignacio at Karla Estrada. Naging deretsahan namang tumugon si Queen Mother Karla Estrada nang tanungin namin ito sa kanya.
" Matagal pa yan Doms. Next year pa yan! " tiktak pa ni QM.
Naging bukambibig na ni Karla na sana dumating din ang isang araw sa kanyang buhay na may isang lalakeng magdadala sa kanya sa altar. Isang araw ng pag-iisang dibdib!
" Plano palang Dom. Napag-uusapan. Basta! Gusto ko na nandoon lahat ng mga mahal natin sa buhay. Hopefully, next year! Basta! " aniyang muli.
Mukhang tanggap naman ni Daniel Padilla ang takbo ng lovelife ngayon ng kanyang Momshie Karla. Sa totoo lang, desenteng tao rin si Jam Ignacio na magalang at marespeto ayon narin sa mga pagkakataong nakakasalamuha ko ito huh! Mukhang mahal na mahal nito ang beshy Karla at ramdam ko na rin ang isang bonggang selebrasyon next year! Abangan!

BRIGHTEST IDEA ANG SIR WIL ONLINE CHALLENGE NI WILBERT TOLENTINO

March 15, 2020 ay isinailalim ang ating bansa sa Enhanced Community Quarantine dahil naging pandemya na ang Corona Virus na kumitil ng milyong buhay mula sa iba't ibang bahagi ng mundo. Halos lahat ng tao, mahirap ka man o mayaman ay walang ligtas sa sakit na ito. Maraming Filipino ang nawalan ng trabaho, naghirap, nagutom at nawalan ng pag-asa dahil sa virus. Naging masaklap ang buhay ng karamihan pero hindi nawalan ng pag-asang mapupuksa rin ang pandemyang kinatakutan ng buong mundo. Napakaraming industriya ang nagsara dahil sa pandenya kung saan kasama ang mundo ng entertainment. Magpahanggang ngayon ay patuloy pa rin ang ating pakikipaglaban sa virus na ito. 
Pero sa gitna ng pakikipaglabang ito, sa gitna ng kalungkutang ito, sino ba naman ang mag-aakalang may gagamiting instrumento ang kataas-taasang Maykapal upang kahit papano ay magkaroon ng kulay ang ating bawat araw at maibsan ang ating lungkot sa nagdidilim nating mundo? May mga taong naitadhana ng mabusilak ang kalooban at hindi matitiis ang kanilang kapwa tao. May mga taong maluwag ang pakiramdam sa nararamdamang hirap ng kanilang kapatiran sa panahong tila wala ng bukas pang masisilayan.
Sa mundo ng entertainment, may isang nilalang, kaibigan at mahal ng lahat ang hindi nagdalawang-isip na gumawa ng kabutihan sa paraang alam niya. Isang kaibigang walang preno sa pagpaparamdam ng kanyang haplos ng pagmamahal sa mga taong itinuring niyang kaagapay at kaibigan sa kanyang naging paglakbay sa magandang buhay. Isang kaibigang nagmula sa wala, nagsikap at ngayo'y nagbubuhos ng biyaya sa kanyang kapwa. Isang instrumento at nagpapa-totoong kapag nagsikap ka sa buhay at may pagmamahal sa kapwa ay hindi magiging imposible ang isang matamis na tagumpay sa buhay.
Siya ay walang iba kundi ang kaibigang Wilbert Tolentino o Wilbert Ting Tolentino na ipinanganak sa Binondo, Manila noong May 18, 1975 na bunso naman sa limang magkakapatid. 
Dahil sa kanyang pagpursige sa buhay, hindi man naging madali ang lahat ay pilit na inabot ni Wilbert ang kanyang pangarap. Nanalo bilang Mr. Gay World-Philippines noong 2009 at naging Entrepreneur, naging isang Network Developments Officer, CEO at Board of Directors ng WEMSAP. Siya rin ang may-ari ng F Club, One 690 at Apollo Club, mga negosyong alam niyang marami siyang natutulungang tao.
Successful na maituturing si Wilbert Tolentino sa lahat ng bakurang kanyang pinasok. Matalino kung tutuusin at malawak ang pananaw sa buhay lalo na sa kanyang mga ideyang hindi matutularan.
Kaya sa gitna ng pandemya ay gumawa ng paraan si Wilbert Tolentino upang maiparating ang kanyang pagtulong sa lahat ng mga taong malalapit sa kanyang puso. Binuo niya ang konsepto ng Sir Wil Online Challenge kung saan hindi siya naging maramot sa pagbibigay ng naglalakihang pa-premyo. Halos walong kategorya o challenges na ang natapos online kung saan nag-umpisa ito sa isang The Queen of Lockdown Transformation 2020. Sinundan ng Sir Wil Extreme Cutie Quest Challenge, Online Star Influencer Season 1, Sir Wil Drag Queen Challenge, Beki Online Pageant titled Queen of bECQi 2020, Wil Or No Wil Online Game Show, The King of ECQ Online Search titled Ginoong Quarantino 2020 at ang Online Star Influencer Season 2. 
At dahil sa kanyang lubos na pagmamahal sa entertainment world, umaariba naman ngayon sa online world ang Sir Wil Media Challenge bilang pasasalamat ni Wilbert Tolentino sa mga miyembro ng media, press, DJ's, radio announcer, broadcaster, bloggers, reporters, writers and columnist across the country mula sa entertainment, lifestyle at pageants. 
Mula sa mga proyektong ito ay masasabi nating napakalaking bagay itong Sir Wil Online Challenge upang mabigyang tulong with a purpose ang bawat sumasali. Isang paraan ng pagtulong ni Wilbert Tolentino makapaghatid man lang ng pagmamahal sa kanyang kapwa Filipino. 
Isang online challenge man ito na may alituntunin, sa totoo lang, this was the brightest idea na aking nakita sa online world habang nakikipaglaban tayo sa pandemyang ito! Isang ginintuang paraan ng pagbibigay saya at kislap sa bawat isa!
Saludo ako sa inyong lahat na bumubuo sa Sir Wil Online Challenge na ito! To God Be The Glory!