SETH FEDELIN GAGAWIN ANG LAHAT PARA SA KANYANG PAMILYA

Aminado si Seth Fedelin na hindi siya sanay sa buhay na kantang tinatahak ngayon sa showbiz. Sanay diumano siyang pagkagising sa umaga ay pamilya niya ang kanyang kasama at kakayod sa anumang meron lang para mairaos ang isang araw upang mabuhay. Sa recent guesting ni Seth sa Magandang Buhay ay hindi nag-alinlangang magkuwento ang nakababatang kapatid nitong si Sofia kung gaano kabuting kapatid bilang Kuya si Seth noon pa. Ayon kay Sofia, tandang-tanda pa niya na halos si Seth na raw ang tumatayong Tatay sa kanilang magkakapatid lalo na noong na-stroke ang kanilang Tatay at ilang buwang nakaratay sa ospital.
Si Seth na diumano ang nagluluto ng pagkain nila kapag pumapasok sila sa school. Nagpa-plantsa ng kanilang damit at naglalaba. 
" Mga grade 6 po yata ako nun. Mga pagkaing pampasok lang naman. Tapos ako naglalaba ng damit naming lahat, underwear namin, mga simpleng gawaing bahay lang. " pagkumpirma mismo ni Seth.
" Kasi na-stroke nga si Papa. Hindi nila alam na nakaratay na noon sa ospital si Papa. Ang alam nila nagpa-doktor lang. Idol ko kasi, tapos, parang ang hirap tingnan na nakaratay siya, kaya kami na ni Mama ang magkatuwang noon. " kuwento pa ni Seth.
" Hindi po ako sanay sa buhay ko sa showbiz ngayon. Kasi for 16 years po ay nasa Cavite lang ako, kami. Simple lang. Tapos ngayon, heto na. " aniya.
Tulad ng laging sinasabi ni Seth na nai-enjoy niya naman ngayon ang blessings na dumating sa kanya. Inamin din nito sa aming naging panayam sa kanya na mahal na mahal na nito ang kanyang trabaho bilang artista lalo na't kumikita na siya at nakakatulong na siya sa kanyang pamilya.
" Nabibilhan ko napo mga kapatid ko ng mga gamit nila, nabilhan ko si Papa ng motor niya, napaayos ko narin po yung bahay namin sa Cavite, sobrang pasalamat ko nalang po sa mga blessings na ibinigay po sa akin. " aniyang paglalahad pa.
" Ginagawa kopo lahat ng ito para po sa pamilya ko. Hinding-hindi po ako mapapagod. " aniya.
Sa kasalukuyan ay aabangan natin ang napakarami pang proyekto ni Seth sa bakuran ng Kapamilya Network. Makakasama ni Seth sa kanyang future projects ang The Gold Squad ganun din ang SethDrea projects nila.