CIA WITH BA: TUTULONG KA NALANG KAILANGAN PA NG PERMIT?

Tutulong ka na lang, kailangan pa ng permit?

Sumiklab ang debate tungkol sa pagkuha ng permit para tumulong sa mga biktima ng bagyo sa episode ng ‘CIA with BA’ nitong Linggo, Setyembre 1.

Sa segment na ‘Yes or No,’ tinanong ni Manilyn ng Mariteam kung kailangan pa daw ba talaga ito dahil nagpla-plano sila ng mga kaibigan niya na mangolekta ng donasyon mula sa publiko at magsagawa ng fundraising activities para sa mga naapektuhan ng mga nagdaang bagyo.

“Officially, the answer is ‘Yes,’” ani Senator Pia Cayetano.

“Nung [time] ng COVID-19, ang daming naglabasan na fundraising [activities] para makatulong sa tao. Tapos naglabas ang DSWD ng paalala na lahat ng gustong mag-fundraising, kailangan kumuha ng permit. Ang daming umangal na netizens dahil hihingi ka pa ng permit e baka ‘yung sasaklolohan mo e namatay na o baka kung ano nang nangyari. Sa pagkakaalala ko, sinuspend muna pansamantala ‘yung requirement na ‘yan but it is a presidential decree na nagsasabing kailangan ng permit,” paliwanag ni Ate Pia.

“The reason for that is [dahil] may mga mabusado, ‘di ba?” pagpapatuloy niya. “Like may mga magsasabing [kahit] ang ganda-ganda nila mag-market ng kanilang organisasyon tapos malalaman mo hindi nakarating [ang mga donasyon]. So tama naman ang DSWD na maging strikto sila doon but I’m still hoping na magkaroon tayo ng way na mas mapadali ‘yan kasi nagiging pahirap sa mga well-meaning citizens naman na gusto automatic makapag-solicit, padala kagad ng pera sa nabagyuhan, tapos hindi pwede. Pero for now, it’s really what the law requires.”

Ikinumpara ni Senator Alan Peter Cayetano ang isyung ito sa kwento sa Bibliya kung saan si Hesus at ang Kanyang mga disipulo ay naglalakad sa isang taniman ng trigo habang Araw ng Sabbath, at nagsimula ang Kanyang mga disipulo na pumitas ng mga butil upang kainin. Sa kwentong ito, binibigyang diin ni Hesus na ang Sabbath ay hindi dapat tungkol sa mahigpit na legalismo kundi tungkol sa pagtugon sa pangangailangan ng tao at pagpapakita ng awa.

“Nakikita natin na kahit maganda ‘yung intensyon ng batas, minsan nagbabangga. For example, sa donations, bakit mo pa papahirapan kumuha ng permit? On the other hand, maraming nanloloko o kaya panis [‘yung pagkain] na naibigay, sinong hahabulin mo? I’m not saying na in every single situation kailangan may red tape o lahat ng klaseng permit. May purpose din po kasi talaga na maraming regulasyon to protect,” paliwanag ni Senator Alan.

“It’s really a balancing act so I think, how we transform into a nation that values the law and then ‘yung law naman protects us. ‘Yon ang isang challenge natin,” dagdag niya.

Para naman kay Boy Abunda, napagtanto niya na, “Kaya pala may mga amendment ang batas, may mga exemption, kasi habang ginagawa pala ang mga batas, may mga bagay-bagay na hindi pa naco-consider, hindi pa nakikita.”

Ang ‘CIA with BA’ ay nagpapatuloy sa legasiya ng yumaong Senator Rene Cayetano at mapapanood tuwing Linggo ng 11:00 p.m. sa GMA7, na may replays sa GTV sa sumunod na Sabado ng 10:30 p.m.