DAHIL SA CIA WITH BA IMPOSIBLENG AMA NAGING RESPONSBLE

Dahil sa ‘CIA with BA,’ ‘imposibleng’ ama, naging responsable

Binisita ng ‘CIA with BA’ ang ama na minsang itinanggi ang kanyang anak at ipinakita kung gaano na siya ka-responsable ngayon.

Noong Pebrero 4, inireklamo si Mike ng kanyang ex-partner na si Catherine dahil sa hindi niya pagtanggap sa kanilang anak. Iginiit pa noon ni Mike na imposibleng siya ang ama ng bata dahil nanganak si Catherine sa kanyang ikawalong buwan ng pagbubuntis.

Sa tulong ng mga eksperto, nagsagawa ng DNA test ang programa kung saan nalaman na si Mike nga ang ama ng bata, 99.999999%.

“Mali po ‘yung pag-aakala ko na wala pong nanganganak ng eight months,” sabi ni Mike noong siya ay binisita ng mga staff ng ‘CIA with BA’ na ipinalabas nitong Linggo, Marso 3.

Sa gitna ng pagtatrabaho, nakakapaglaan na ngayon ng oras si Mike para sa bata – isang bagay na hindi niya inakalang magiging bahagi ng kanyang buhay.

“Masaya kasi naaalagaan ko, nakakarga ko,” kwento niya. “Pag lumaki po si CJ, ang balak ko po, pag-aralin, bigyan ng baon, pakainin at alagaan.”

Para naman kay Catherine, magaan ngayon sa kanyang pakiramdam ang kanilang sitwasyon.

“Ang saya-saya. Parang natanggal ‘yung problema mo. Kahit pagod na pagod ka, makikita mo ‘yung mag-ama, nagbo-bonding,” she said. “Kung pwede lang sana araw-araw ganon.”

Bukod sa mga grocery items at iba pang tulong na ipinangako ng ‘CIA with BA,’ nabigyan din ng bagong pedicab si Catherine na si Mike mismo ang humiling.

“Para kung gusto man niya bumiyahe ulit, wala siyang aalalahanin na boundary,” saad niya.

“Alam niyo po, kay Cathy at kay Mike, marami talagang nagalit kay Mike,” pagbabahagi ni Senador Alan Cayetano sa pagtatapos ng episode.

“Medyo hindi maganda intensyon niya kay Cathy. Pero nung nalaman niya ‘yung totoo, truth matters na yes, anak niya ‘yon, he said he’ll take responsibility,” dagdag pa niya.

Ang ‘CIA with BA’ ay pagpapatuloy ng nasimulang misyon ni Senador Rene Cayetano, ang yumaong ama ng magkapatid na senador. Si Senador Rene ang orihinal na abogadong nagbibigay ng legal advice sa telebisyon at siyang host ng sikat na programang ‘Compañero y Compañera’ noong 1997 hanggang 2001.

Huwag palampasin ang ‘CIA with BA’ kasama sina Alan, Pia, at award-winning TV host na si Boy Abunda tuwing Linggo ng gabi, 11:00 sa GMA7.