SINO ANG AMA? DNA TEST REVEAL SA CIA WITH BA

Sino ang ama?: DNA test reveal sa ‘CIA with BA’

Dumulog si Catherine sa ‘CIA with BA’ upang ireklamo si Mike, ang kanyang ex-partner na itinatanggi ang pagiging ama sa kanilang anak na isang taong gulang.

Ibinahagi ng dalawa ang kani-kanilang panig sasegment na ‘Case 2 Face’ sa episode nitong Linggo, Pebrero 4.

Ayon kay Catherine, nahulog ang kanyang loob kay Mike kahit na siya ay mas nakatatanda. Nang siya ay mabuntis, hindi ito madaling tinanggap ni Mike.

Giit ng lalaki, imposible umano niyang maging anak ang batang dinala ni Catherine sa kanyang sinapupunan dahil nanganak ito sa kanyang ika-walong buwan.

Para matulungan silang makumpirma ito, ipina-DNA test sila ng ‘CIA with BA,’ sa tulong ng mga eksperto.

Bago malaman ang resulta, binasa ni Senador Pia Cayetano ang mga alituntunin bilang mga magulang base sa Article 220 ng Family Code, kabilang ang pag-aaruga, pagmamahal at pagbibigay suporta sa bata, pagtuturo sa kanila ng mabubuting asal, pagpo-protekta sa kanila mula sa anumang kapahamakan, pagbuo ng mahahalagang desisyon para sa kanila, pagdidisiplina kung kinakailangan, at pagsunod sa batas.

Matapos nito ay binasa na rin ni Ate Pia ang resulta na nagsasabing may 99.999999% na probabilidad na si Mike nga ang ama ng anak ni Catherine.

Dito naiyak na si Catherine at tila nakahinga ng maluwag. Tinanggap naman ni Mike ang responsibilidad ngunit aniya’y kailangan niya pa itong prosesuhin.

Nangako naman ang ‘CIA with BA’ na tutulong sa pagharap nila sa bagong yugto ng kanilang buhay.

“Sometimes, we hold on to something. Pero ‘pag hindi mo binitawan, hindi mailalagay ‘yung mas mabuti para sa ‘yo,” saad ni Senator Alan Peter Cayetano sa pagtatapos ng episode.

“If you’re holding on to something na tingin mo ‘yan ‘yung absolute kaligayahan, pero nakikita mo [rin] na parang hindi, bitawan mo. Baka ‘yung para sa ‘yo ay makikita mong eto talaga ‘yung para sa ‘yo,” dagdag pa niya.

Ang ‘CIA with BA’ ay pagpapatuloy ng nasimulang misyon ni Senador Rene Cayetano, ang yumaong ama ng magkapatid na senador. Si Senador Rene ang orihinal na abogadong nagbibigay ng legal advice sa telebisyon at siyang host ng sikat na programang ‘Compañero y Compañera’ noong 1997 hanggang 2001.

Huwag palampasin ang ‘CIA with BA’ kasama sina Alan, Pia, at award-winning TV host na si Boy Abunda tuwing Linggo ng gabi, 11:00 sa GMA7.