ARJO ATAYDE HINDI MATATAWARAN ANG GALING!

Nagsisimula palang noon si Arjo Atayde bilang baguhang aktor nang sabihan namin itong darating ang araw na aalagwa siya sa kanyang karera sa showbizlandia. Mula sa teleseryeng E-Boy kung saan tabain pa siya at totoy, nagpakitang gilas na ang sikat na sikat ngayong aktor ng kanyang henerasyon. Sinundan pa niya ito ng tamang pagpapapayat hanggang sa tuluyan na nga siyang nabigyang-pansin ng Kapamilya Network at nabigyan ng hindi matatawarang karakter sa naglalakihang teleserye ng Dreamscape. Umalagwa na nga ang aktor at nakatanggap ng parangal mula sa iba't ibang prestihiyosong award-giving bodies at patuloy na pinupuri magpahanggang ngayon. Sa latest IWant Original series ng Dreamscape Digital ay kakaibang karakter naman ang kanyang ginagampanan. Kakaibang Arjo Atayde ang ating mapapanood dahil kakaibang role naman ang bibigyang buhay niya rito. Isang socio-political action drama series ang BAGMAN kung saan isang barberong ordinaryong mamamayan ang ginagampanan ni Arjo bilang si Benjo. Isang madiskarteng anak na gagawin ang lahat para sa kanyang pamilya. Ayon pa mismo sa Dreamscape Digital, wala silang ibang nakitang pupuwedeng gumanap sa role kundi bukod-tanging si Arjo lamang. Labis naman ang pasalamat ni Arjo sa buong team ng BAGMAN na may 12 part-series na sinulat ni Shugo Praico at nilikha naman nina Lino Cayetano, Philip King at Shugo. Ang unang 6 na episodes nito ay magiging available sa IWant nang libre simula March 20. Tatlong episodes naman ang mapapanood sa March 27 at ang huling tatlong episodes naman ay sa April 3! Mula sa paggawa ng mga teleserye sa telebisyon na minahal at tinutukan ng mga Pilipino, panibagong yugto sa pagbibigay ng mga de-kalibreng pelikula ang tatahakin ng Dreamscape Entertainment sa Dreamscape Digital na siya ring nasa likod ng trending movie na GLORIOUS kasama ang mga romantic drama na THE GIFT at APPLE OF MY EYE at ang edgy series na PROJECT FEB 14!